मुंबई
दक्षिणेचा सुपरस्टार कमल हसन मराठी चित्रपट आणि नाट्यसृष्टीवर मनापासून प्रेम करतो आणि म्हणूनच त्याची एक चांगला मराठी चित्रपट करण्याची इच्छा आहे. 'सामना'मध्ये कमल हसनने लिहिलेल्या लेखात त्याने आपली ही इच्छा व्यक्त केली आहे.


कमल हसन म्हणतो, हल्लीचे मराठी चित्रपट फारच अप्रतिम बनत आहेत. नटरंग पहाण्याची माझी इच्छा आहे. नटरंगमघ्ये माझा आवडता कलाकार अतुल कुलकर्णीने काम केले आहे. माझ्या कारकिर्दीला ५० वर्षे पूर्ण झाली. परंतु मला माझ्या कारकिर्दीत एक चांगला मराठी चित्रपट करण्याची संधी मिळाली नाही. मला नाट्यसंस्कृतिखूप आवडते. मराठी भाषेचे मला जास्त ज्ञान नाही पण या भाषेतील कलाकृती मला सब टाइटलशिवाय समजतात.

खूप वर्षांपूर्वी मी नटसम्राट नाटक पाहिले होते. नाटक पाहिल्यानंतर बराच वेळ माझे डोळे भरून येत होते. फारच अप्रतिम नाटक. रजनीकांत मूळचा मराठी. मी त्याच्याबरोबर १९७६ मध्ये पहिल्यांदा काम केले तेव्हाच मी त्याला म्हटले होते की मला मराठी शिकव. परंतु तो योग अजूनही आला नाही. मला वाटते की रजनीकांतही आता मराठी  विसरला असेल.