पुणे
पुण्‍यातील कोरेगाव पार्क या हाय प्रोफाईल भागात असलेल्‍या ओशो आश्रमाजवळील जर्मन बेकरीत मोठा बॉम्ब स्‍फोट झाला असून त्‍यात 10 जण ठार झाले असून 40 पेक्षा अधिक जण जखमी झाले आहेत. मृतांमध्‍ये परदेशी नागरिकांचाही समावेश असल्‍याचे प्रत्यक्षदर्शींनी सांगितले आहे.


येथील कोरेगाव पार्क भागात असलेल्या जर्मन बेकरीमध्ये शनिवारी सायंकाळी 7.30 वाजेच्‍या सुमारास हा स्फोट झाला. स्फोट झालेल्या ठिकाणापासून ओशो आश्रम जवळ आहे. घटनेनंतर लगेचच संपूर्ण परिसराला घेराव घालण्‍यात आला असून एटीएस पथक घटनास्‍थळी रवाना झाले आहे. याच परिसरात एक बेवारस बॅग आढळून आली आहे. गृह राज्यमंत्री रमेश बागवे यांनीही घटनास्‍थळी भेट देऊन माहिती घेतली आहे.
दरम्यान, या भागात नागरिकांनी गर्दी करू नये तसेच अनोळखी व संशयास्‍पद व्‍यक्ती व वस्‍तूंची माहिती त्‍वरित पोलिसांना देण्‍याचे आवाहन करण्‍यात आले आहे.