मुंबई

शाहरुखमध्‍ये हिंमत असेल तर त्याने पाकमध्‍ये जाऊन तिथे चित्रपट बनवून दाखवावा तिथे चित्रपट बनवू दिला जातो का हे देखिल त्याच्‍या लक्षात येईल, असा खोचक टोला आपल्‍या आवाजाने शाहरुखच्‍या अनेक चित्रपटांना हीट करणा-या गायक अभिजीत भट्टाचार्य यांनी लगावला आहे. पाकमध्‍ये हिंदुस्‍तानी कलाकारांचा अपमान होत असताना शाहरुख सारखे पाक धार्जिणे मात्र पाक प्रेमाचे गोडवे गात असल्‍याची टीकाही त्याने केली आहे. 

शिवसेनेचे मुखपत्र असलेल्‍या 'सामना'त अभिजीतने म्हटले आहे, की कुठल्‍याही देशात जाऊन तिथे काम करण्‍यासाठी वर्क परमीटची आवश्‍यकता असते. मात्र भारतात चित्रपट व्‍यवसायाला उद्योगाला दर्जा मिळूनही पाकिस्तानी गायक कुठल्‍याही वर्क परमिट शिवाय भारतात येऊन गाणे सुरू करतात. या उलट स्थिती पाकमध्‍ये आहे. तिथे भारतीय कलावंतांना नेहमीच अपमान सहन करावा लागतो. तिथे बॉम्बस्‍फोटांशिवाय काहीच होत नाही तिथे चित्रपट व्‍यवसाय आणि थिएटर्सवरही बंदी आहे. त्‍यामुळे हे लोक टुरीस्‍ट व्‍हीसावर इथे येतात येतात आणि इथल्‍या शोज आणि रिएलीटी स्‍पर्धांमध्‍ये सहभागी होऊन इथल्‍याच लोकांच्‍या छातीवर कायमचे बसतात. हे कसे खपवून घेतले जाते.

याकडे लेबर लॉ, इंडस्‍ट्रीयल लॉ विभागाचे लक्ष का नाही,  असा सवालही त्‍याने उपस्थित केला आहे.
या पाकिस्‍तानी कलाकारांना संधी देणा-या महेश भट्ट आणि रमेश तौरानी यांच्‍यावरही टीकेची झोड उठवताना अभिजीतने त्‍यांना संधी देणा-या प्रत्येक दिग्दर्शक, संगीतकार आणि निर्मात्‍यावर कारवाई व्‍हावी अशी मागणी केली आहे.