पुणे

पुण्‍यातील कोरेगाव पार्क परिसरात शनिवारी सायंकाळी झालेल्‍या बॉम्बस्फोट प्रकरणी एटीएसने दोन संशयितांना ताब्यात घेतले असून त्‍यांच्‍या माध्‍यमातून स्‍फोटाचा गुंता सोडविण्‍याचा प्रयत्न केला जात आहे. पुण्यातील कुदळवाडी आणि जनवाडी भागातून अटक करण्‍यात आलेले दोघेही इंडियन मुजाहिदिनशी संबंधित असून इंडियन मुजाहिदीनचा मोस्‍ट वॉन्‍टेड दहशतवादी रियाज भटकल आणि शब्बीर गंगवाली यांच्‍याशी संबंधित आहेत.

इकबाल आणि रियाज भटकल हे २००५ ते २००८ मध्ये पुण्यातील कुदळवाडी भागात राहत असताना त्यांच्‍यासाठी अटक करण्‍यात आलेला तरुण काम करीत असे तर दुसरा भारतात बनावट नोटांचे रॅकेट वाढविण्‍या प्रकरणी हवा असलेल्‍या शब्बीर गंगवालीचा प्रमुख साथीदार आहे. दोघांची एटीएसकडून चौकशी सुरू असून पोलीस इलीयास चौधरीचाही शोध घेत आहेत.