कोलकाता

गेल्‍या अनेक दिवसांपासून जन्‍ममृत्युची झुंज देत असलेले प.बंगालचे माजी मुख्‍यमंत्री ज्‍योजी बसू यांचे अखेर रविवारी सकाळी 11.47 वाजेच्‍या सुमारास निधन झाले. ते 96 वर्षांचे होते.

बसू यांना 8-10 दिवसांपूर्वी येथील एका रुग्णालयात उपचारासाठी दाखल करण्‍यात आले होते. तेव्‍हापासूनच त्यांची प्रकृती गंभीर होती. त्‍यांना गेल्‍या तीन दिवसांपासून व्‍हेंटीलेटरवर ठेवण्‍यात आले होते. आज अखेर त्‍यांच्‍या कुटुंबीयांच्‍या आणि मुख्‍यमंत्री बुध्‍ददेव भट्टाचार्य यांच्‍या परवानगीनंतर त्यांची कृत्रिम श्‍वसन यंत्रणा काढून घेण्‍यात आली.

मंगळवारी अंत्‍यसंस्‍कार


बसू यांच्‍यावर मंगळवारी अंत्यसंस्‍कार केला जाणार आहे.  कोलकाताचे महापौर विकास भट्टाचार्य यांनी दिलेल्‍या माहितीनुसार त्‍यांचा मृतदेह आज दुपारी दोन वाजता अंतिम संस्कार पार्लर पीस हेवन नेले जाणार असून 19 जानेवारी रोजी केवडातला स्‍मशानात अंत्यसंस्‍कार केला जाणार आहे.

ज्योती बसू यांनी नेत्रदान करण्‍याचा संकल्‍प केला असल्‍याने एक नेत्र रुग्णालयाच्‍या डॉक्टरांनी त्‍यांचे डोळे काढून सुरक्षित ठेवले आहेत. तर त्‍यांनी वैद्यकीय अभ्‍यासक्रमासाठी आपले शरीरही दान करण्‍याचा संकल्‍प केला असल्‍याने त्यांचे शरीरही दान केले जाणार आहे.
8 जुलै 1914 रोजी जन्‍मलेले बसू हे अनेक वर्षे प.बंगालचे मुख्‍यमंत्री होते. मार्क्सवादी कम्युनिष्‍ट पक्षाचे ज्येष्ठ नेते असलेले बसू आयुष्‍यभर या विचारांना टीकून होते. आपल्‍या राजकीय कारकिर्दीच्‍या काळात 1996 मध्‍ये त्‍यांना पंतप्रधान बनण्‍याचीही संधी आली मात्र त्यांनी ती विनम्रपणे नाकारली.
 
पक्षाचे ज्‍येष्‍ठ नेते विमान बोस आणि गृहमंत्री पी.चिदंबरम यांनी त्यांच्‍या निधनाची अधिकृत घोषणा केली. त्‍यांच्‍या मृत्यूबद्दल पंतप्रधान डॉ.मनमोहन सिंह, राष्‍ट्रपती प्रतिभाताई पाटील, संपुआ आघाडीच्‍या अध्‍यक्षा सोनिया गांधी यांनी दुःख व्‍यक्त केले आहे.