न्यूयॉर्क

पाकिस्तानी गुप्तचर संस्था आयएसआयचे लश्कर-ए-तोयबासोबत घनिष्ठ संबंध असून, काश्मीरसह भारतातील इतर भागात दहशतवादी कारवायांसाठी त्यांचा वापर केला जात असल्‍याची माहिती संयुक्त राष्ट्र संघटनेने एका अहवालातून मांडली आहे.

पाकिस्तानच्या माजी पंतप्रधान बेनझीर भुट्टो हत्याकांडाचा तपास करीत असलेल्‍या या समितीने आपल्‍या अहवालात म्हटले आहे, की पाक लष्कराने 1996 मध्ये अफगाणिस्तानवर ताबा मिळविण्यासाठी तालिबान्यांची मदत केली होती. तशीच योजना 1989 पासून काश्मीरमध्ये भारता विरोधात वापरली जात आहे.

आपल्या उद्दिष्टांची पूर्तता करण्यासाठी दहशतवादाचा हत्यार म्हणून वापर करण्याच्या पाकच्‍या धोरणामुळे लष्कर आणि कट्टरपंथीयांमधील संबंध दृढ झाले असल्‍याचे या 65 पानांच्‍या अहवालात म्हटले आहे.